क्यतनी बढ़िया भगंता क भउजी! - पढ़ीस

छिनु-छिनु राँह देखि का काटिस,
कब भाइनि की भउँरी ह्वयि-हयिं,
रूनुकि-झुनुकि डोली ते उतरी,
क्यतनी सुंदरि भगंता की भउजी!
चुंदरी से मुलक्यसयि झाँपि मुँहु,
लरिका-बिटिया चुटकी काटयिं;
भुँइँ मा गड़ी जायि खिसियउनी,
अतनी खलिस[1] भगंता की भउजी!
करयिं म्यहरिय मुँहुँ द्यखरउना
वह घूँघुट मा आँखी मूदे!
काँपि-काँपि काढ़यि पयिंलगवा-
क्यतनी डरभुत[2] भगंता की भउजी!
उये सुर्ज अथये तकु भिंजरयि[3] ,
ननद द्यावरन का मनु राखिय;
कर्री बात जहरू असि घूँटयि,
अतनी सालिस[4] भगंता की भउजी!
बाह्यर भीतर प्वाढ[5] पर मनु,
तब वह असिलि रूप दरसायिसि,
धीरे-धीरे ग्वाड़ गड़ायिसि-
अतनी गहबड़ि[6] भगंता की भउजी!
जो जस किहिस फलु तिहिका,
झुँकि-झुँकि दूलहू तक ‘वॉ-बोले’,
पूरे बॉटन बॉटि दिहिसि जब-
अतनी भारी भगंता की भउजी!
पुरवा गाँउॅ, जिला तकु जानिसि,
भाइनि केघर दुलहिनि रानी-
रोटी-कपरा क्यार मुकदिमा।
अकिल वाली भगंता की भउजी!
बड़े बहादुर जी घर वाले,
मूड़े बाहयिं धरि-धरि धाहयिं;
नाग-नाथ तस साँप-नाथ मुलु,
पूरयि किहिनिसि भगंता की भउजी!