ਆਜ਼ਮ ਮਲਿਕ

ਆਜ਼ਮ ਮਲਿਕ ਤੇ, ਦੁੱਖ ਦਾ ਤੇ ਦੁੱਖ ਨੂੰ ਦੱਸਣ ਦਾ ਕਰਮ ਹੋਇਆ ਹੈ । ਸਾਈਂ ਨੇ ਸੁਨੇਹੜਾ ਘੱਲਿਆ ਹੈ, ਸਿਰ ਤੇ ਖਾਰੀ ਚਾਈ ਉਹ ਦਰ ਦਰ ਹੋਕਾ ਦੇਵੇ । ਸਾਡੇ ਪਾਸੇ ਵੀ ਇਹ ਹੋਕਾ ਪਹੁੰਚ ਗਿਆ ਹੈ । ਵਧਾਈ ਹੋਵੇ । ਆਜ਼ਮ ਜਾਣਦਾ ਹੈ ਦੁੱਖ ਨੂੰ ਦੱਸਣਾ ਸੌਖਾ ਨਹੀਂ । ਇੱਕੋ ਸਾਹ ਦਾ ਪੈਂਡਾ ਹੈ, ਸਦੀਆਂ ਜੇਡੀ ਲੰਮੀ ਵਿੱਥ ਏ, ਤੇ ਨ੍ਹੇਰਾ ਪੱਬਾਂ ਭਾਰ ਖੜ੍ਹਾ ਏ ਤੇ ਦੁਖ ਵੀ ਉਹਦਾ ਆਪਣਾ ਨਹੀਂ, ਸਾਰੇ ਵਜੂਦ ਦਾ ਏ । ਫੇਰ ਵੀ ਉਹਦੀ ਬੋਲੀ ਥਿੜਕੀ ਨਹੀਂ। ਸੰਜਮ, ਸਹਿਜ ਤੇ ਵਹਾਅ ਸੰਭਿਆ ਰਿਹਾ ਹੈ । ਮੈਂ ਆਜ਼ਮ ਨੂੰ ਵਧਾਈ ਦਿੰਦਾ ਹਾਂ ।- ਨਵਤੇਜ ਭਾਰਤੀ (ਕੈਨੇਡਾ) ਆਜ਼ਮ ਮਲਿਕ ਪਾਕਿਸਤਾਨੀ ਪੰਜਾਬੀ ਕਵਿਤਾ ਦੀ ਪੱਕੀ ਰੀਤ ਵਿੱਚ ਟਿਕਿਆ ਪਰਪੱਕ ਸ਼ਾਇਰ ਹੈ। ਜਿਸਦੀ ਸ਼ਾਇਰੀ ਵਿੱਚ ਹਸਤੀ ਵੀ ਬੋਲਦੀ ਹੈ, ਧਰਤੀ ਵੀ ਗੂੰਜਦੀ ਹੈ। ਉਹ ਰੂਹਾਨੀ ਰੰਗਤ ਵਾਲਾ ਵੀ ਹੈ, ਲੋਕਾਈ ਦੇ ਦਰਦ ਨੂੰ ਜ਼ੁਬਾਨ ਦੇਣ ਵਾਲਾ ਵੀ। ਉਸਨੂੰ ਸੂਫੀ ਵੀ ਪ੍ਰੇਰਦੇ ਹਨ ਤੇ ਤਰੱਕੀ-ਪਸੰਦ ਵੀ। ਉਹ ਗਹਿਰਾ ਵੀ ਹੈ ਤੇ ਸਾਦਾ ਵੀ। ਇਹੀ ਉਸ ਦੀ ਸ਼ਾਇਰੀ ਦੀ ਤਾਕਤ ਹੈ ।- ਗੁਰਤੇਜ ਕੋਹਾਰਵਾਲਾ