అదను

కొన్నిసార్లు ఆడకుండానే

విరమించవలసి వస్తుంది.

సకలాలంకారాలూ చేసుకొని

సర్వ సన్నద్ధంగా ఉన్నా,

నీ పాత్ర రాకండానే నాటకం

ముగింపుకొచ్చేస్తుంది.

నూరిన నీ కత్తి

వీరత్వాన్ని కురిపించకముందే,

ఒక మహా యుద్ధం

కళ్ళముందర జరిగిపోతుంది.

అయినా, కదిలే నదిలో దూకి

ఈదులాడాలనుకొన్నప్పుడు

ఏ క్షణం బాగుంటుందనే ఆలోచనకి తావేలేదు.

ఎడతెగని రాత్రిని

ఎదిరించి ప్రయాణించాలనుకొన్నాక

ఎప్పుడు బయల్దేరాలనే ప్రశ్నే ఉదయించదు.

ఇక్కడ రిహార్సల్స్‌ లేవు,

రీటేక్‌ లూ లేవు.

ఉన్నది ఒకే ఒక ప్రదర్శన.

అది ఆరంభించడమే గాని,

అదనుకోసం చూసి ప్రయోజనం లేదు.