వసంతం

ఇక నువ్వు వచ్చేస్తున్నావనగానే
గూడు కట్టేందుకు
గడ్డిపరకను వెతికే పిచ్చుకలా
లోపలా బయటా
హడావిడి అంతా నాదే

కౌగిలించుకు
బతుకునిచ్చే నవ్వూ, మాటా,
ప్రతి కొత్త కోరికా
నువ్వేనని
నీ తొలి అడుగుకై
ప్రతి పడిగాపూ నాదే

జొన్న చేలమీద
తెలిమంచు కరిగిపోతున్నపుడూ
పొద్డున్నే సూరీడి నవ్వు
కొంచెం ఎర్రబడుతున్నపుడూ
ప్రతి గాలి అడుగు చప్పుడూ
నీదేననుకుని
గుమ్మం దగ్గరకు పరిగెడతాను

కానీ బయట కొమ్మకు
పొటమరిస్తున్న చిగురును
చూడగానే తెలుస్తుంది
నీ రాక నా కన్నా దానికే బాగా తెలుసునని