కొన్ని దూరాలంతే!

కొన్నిసార్లు కొన్ని దూరాలంతే
పలకరింపులకూ అందకుండా

దగ్గరగానే వున్నామనుకుంటామా-
వెతుక్కున్నా తగిన మాట దొరకదు
ఏమీ తెలియని చూపులే భారంగా మిగిలిపోతాయి
పోనీ దూరాలన్నీ మాటలతో కుట్టేద్దామనుకుంటామా-
గాలిలోనే మాటలు కరిగి మబ్బుల్లా తేలి పోతాయి
అసహనపు కాలమూ
అలజడి చేస్తూ
మనసులను కలవనీదు

గుండెలో వెలితొకటి
ముల్లులా తొలుస్తూనే వుంటుంది
నిస్సహాయంగా శూన్యమేదో
దారికాచి పరిహసిస్తూనే వుంటుంది

అవతలి కొసను తాకాల్సిన
ప్రాణమొకటి
నీళ్ళబయటి చేపై
కొట్టుకుంటూనే వుంటుంది
లోపలి ఆశ మాత్రం
అదే దారికేసే చూస్తూంటుంది.