'ജന്മം'- വി.ആര്‍. രാമകൃഷ്ണന്‍ എഴുതിയ കവിത's image
NaN min

'ജന്മം'- വി.ആര്‍. രാമകൃഷ്ണന്‍ എഴുതിയ കവിത

വി.ആര്‍. രാമകൃഷ്ണന്‍വി.ആര്‍. രാമകൃഷ്ണന്‍
0 Bookmarks 34 Reads0 Likes

 

ആകാശത്തുനിന്ന്
ഒരില അടര്‍ത്തി തിന്ന്
ആഴിതന്നഴലൂറും നീരു്
കരിയിലപോലെ ശ്വസിച്ച്
വെന്തെരിയുമുള്ളം കാലിനാല്‍
കാലദേശങ്ങളിലൂടെ
അലഞ്ഞലഞ്ഞലയുമ്പോള്‍
പണിയിടങ്ങളിലെ പരുക്കും
ബലിനിലങ്ങളിലെ നനവും
പാഴിടങ്ങളിലെ വാഴ്‌വും
എന്നോടു പറയുന്നു
ഞാനൊരു മനുഷ്യനല്ലെന്ന്
ജന്മശാപങ്ങളുടെ
കനല്‍പൊന്തകളിലൂടെ
ജനിതക നേരുകളുടെ
കറുത്തവെളിച്ചത്തിലൂടെ
വിശന്നു വേകുന്ന പാരവശ്യങ്ങളിലൂടെ
എന്നെയവര്‍ വഴിനടത്തി
ആചാരമളന്നകലത്തില്‍
കുരലൊച്ചകള്‍ക്കിപ്പുറത്ത്
തെറികൊണ്ടവരെന്റെ
തന്തയെ തല്ലി
തെമ്മാടിത്തങ്ങള്‍ കൊണ്ട്
തള്ളയെ പൊള്ളിച്ചു
തായൊളിയെന്നെന്നെ
ബിരുദപ്പെടുത്തുന്നു.
ഞാനാരാണെന്നാരാഞ്ഞ്
നെഞ്ചില്‍ നെരിപ്പുമായി
തഞ്ചംതെറ്റി തരംതെറ്റി
തണലറ്റ് താളംതെറ്റി
ജാതകം കത്തിച്ച
ചിതയില്‍നിന്നു ചിതയിലേക്ക്
ജനിച്ചുകൊണ്ടേയിരിക്കുന്നു
ഇനിയുമിപ്പോഴും.
 

No posts

Comments

No posts

No posts

No posts

No posts