రెండుజడలు

జీవకణాలు సలిపే క్షణాల సృష్టి
ఈ వసుంధరపైన జీవనవృష్టి
డీఎన్ఏ రెండుజడల పరిష్వంగం
శివశక్తుల తాండవ తరంగం
జీవకణాల సంయోగవియోగాలు
భావకవుల భవిష్యత్కావ్యాలు
అనంత చరణాల ఈ జీవనగీతం
శతసహస్రవాద్యాల స్వరసంగమం
ఈ కంప్యూటర్ ప్రోగ్రాం ప్రణాళిక
మానవమేధ కొక ప్రహేళికల కేళిక
జనియించిన శిశువుల కేక
మరణానికిముందటి శ్వాస
ప్రణయాశ్లేషములో ప్రథమ చుంబనం
సమరాంగణములో సాహస విజృంభణం
హృదయాన్ని వణికించే వసంతయామినిలాటి యౌవనం
దేహాన్ని వణికించే హేమంతయామినిలాటి వార్ధక్యం
నవరసాల భావోద్రేకాల ఇంద్రధనుస్సు
రకరకాల రోగోద్వేగాల అంపశయ్య
పలికితే పలికించేది కులికితే కులికించేది
కదులుతూ నడిపించేది పెరుగుతూ బ్రదికించేది
జన్యువులే జీవకణాలే సర్పిలాల సంభోగాలే
చతురక్షర భాషలో వ్యాకరణదోషాలు దొర్లితే
సృష్టిగీతంలో అపస్వరవిపంచిక పలుకుతుంది
జీవననృత్యంలో మరణమృదంగం మ్రోగుతుంది
జీవనసముద్రమంథనంలో
ఆనందరాగాలను శోకార్ద్రరోగాలుగా మార్చి
ఆరోగ్యసూర్యుని మేఘాచ్ఛాదితం చేసి
అమృతానికి బదులు గరళాన్ని
ఉద్భవింపజేసే కణాలు
కాలునికి అర్పణాలు యమునికి తర్పణాలు
అదను చూచుకొని వృశ్చికము కాటేస్తుంది
కర్కటకము కౌగిలించుకొంటుంది
ఫలితం – ఇంకా ఆన్సర్ దొరకని కాన్సర్