గాడిద అంతరాత్మ

అదేపనిగా

తదేక ధ్యానంలో

బూడిదరంగు

గాడిద పిల్ల!

చిందులు వేసే దీనికి

ఎందుకు ఇన్ని ఆలోచనలు?

ఏ భారమూ లేని ఈ వయసులో

గాభరా పడిపోయింది తల్లి.

పాలుతాగవచ్చిన పసిదాన్ని

నిలిపి నీతులు చెప్పింది

“అలోచన పనికి రాదు మన జాతికి

కాలో చేయో విరిగే వరకు చేయాలి చాకిరీ

చేలోపడి మేస్తున్నది చెడిపోయింది

నీలాగే అది నిత్యమూ ధ్యానించేది

జ్ఞానోదయమైనది

ఓనామాలు తెలియకున్నా ఓండ్ర పెడుతుంది”

కడుపు నింపుకొని

“కడు విచిత్రం బ్రతుకు”

పొడవుగా నిట్టూర్చింది!

పడమట పొద్దువాలింది.