గాలిపటం

ఏమిటో ఆ గాలిపటం
ఎగిరిపోతున్నది
పడమటి గాలులకు
ఎగసిపోతున్నది

గతంలో కూడా ఇలాగే ఎన్నో గాలిపటాలు
రెక్కలు విప్పిన విహంగాల్లా
రివ్వుమన్న విమానాల్లా
దూసుకుపోయి
అంబరాన్ని చుంబించే ప్రయాణాల్లో
పల్టీలు కొడుతూ అట్టహాసాలు చేస్తుంటే

ఇక్కడ నేలపై
గుండెలు జారిపోతున్నా
శక్తినంతా కూడదీసుకుని
వాటి ప్రతి కదలికనూ నిలకడ చేస్తే …

తీరాలు దాటి దూరాలు చేరిన
సంబరాల్లో
నడిపించిన చేయి విడిచిపోయి
పేగుబంధం తెంచుకుంటే
కొమ్మనొదిలిన ఎండుటాకుల్లా కొట్టుకొచ్చీ
చేవ చచ్చి చిత్తుకాగితాల్లా విసిరివచ్చీ
ముళ్లపొదల్లో చిక్కలేదా…

మరి ఎందుకో ఆ గాలిపటం
మురిసిపోతున్నది
పడమటి గాలులకు
మిడిసిపడుతున్నది!