తీరనిది

దాహంతో నువ్వు తపించిపోయేటప్పుడు
అప్పటిదాకా నీపై తారాడిన
చలచల్లని కారుమబ్బు
మెల్లగా ఘనీభవిస్తుంది
అదాటుగా పైనుంచి శిలావర్షం కురుస్తుంది

సెలయేటి తేటనీటిలో నువ్వు చేతులు ముంచుతావు
దోసిట్లో నీరు
రక్తవర్ణం దాల్చుతుంది

నది ఒడ్డునే నువ్వు పరిగెత్తి పరిగెత్తి
రొప్పుతూ ఆగిపోతావు
ప్రాణం కడగట్టుతుంది
అందీ అందకుండా అది సాగిపోతుంది

దాహం తీరదు
తపన ఆగదు

అలిసిపోయి అలిసిపోయి కట్టకడపట
ఒకానొక సాగరతీరం చేరతావు
అదొక్కటే నిన్ను దప్పిక తీర్చుకొమ్మని
ఆదరంగా పిలుస్తుంది.