కుదరని గాత్రం

ఎంత శ్రుతి చేసినా
పాట రాగం కుదరడం లేదు
గొంతు ఎంత సవరించినా
పల్లవికి యోగం కలగడం లేదు
పూల పరిమళాలను మోసుకొచ్చే
ఋతువు జాడ కానడం లేదు

కొనగోటితో మీటితేనే
సరిగమలు జలపాతాలై దూకేవి
చిన్న స్పర్శ తాకిడికే
శరీరం కువకువ పులకరించేది

బిగి కౌగిళ్ళ పొగలు
కక్కే వేడి నిట్టూర్పులు
పడకగది దాంపత్యం సత్యం

అవయవాలు తావు తప్పిన ఆనవాళ్ళు
వరమివ్వని వ్యవహారాలు
మంచాలు విడివడిపోవడం సత్యం

పడుతూ లేస్తూ
గౌరవ సూచకంగా
వయస్సు వెనకడుగు వేస్తుంది
మిసిమి మనసు
మూతి ముడిచి
పరువు పరుగు పందెం కాస్తుంది

బతుకు పుస్తకం
చివరి అధ్యాయంలో
సరిదిద్దుకోలేని
తప్పొప్పుల పట్టిక

ఎంతకూ కుదరదు గాత్రం
అంతు దొరకనే దొరకదు
నవ పునర్జీవన సూత్రం