రహస్య సాంగత్యం

కనపడని ఒక విచ్ఛేదం
కడుపులో పొంచి వున్నట్టు
బద్దలవబోయే బాంబు ఒకటి
లోపల బస చేసి టిక్ టిక్ టిక్ అంటున్నట్టు
దేహం లోని అంతరింద్రియంపై
దాడి చేసేందుకు క్రూరమృగమొకటి
దాపుల్లో గుఱ్ఱుమంటూ వేచి వున్నట్టు
లోపలి అల్లకల్లోలాల రహస్య రంపపు కోతలతో
రోజుల నిప్పుల కుంపట్ల మీంచి రోజూ నడక

అసంతృప్తి అణ్వస్త్రమై
అంతరంగంలో చొరబడి
భయానకత చుట్టుముట్టి
స్తిమితానికి తెర పడి
సాధించింది చాలక
చాలనితనం చాలా పెరిగి
గుండె లోపలి గుబులు లాంటి దిగులు
కడుపు లోపలికి బదిలీ అయి కదలాడుతున్నట్టు –

స్వల్పత్వపు సలుపు మీద సులువు కాదు గెలుపు
అల్పసంతోషిత్వం అనల్ప అదృష్టమే
మింటిని తాకే కళాతృష్ణ
కంటి మీద కునుకు లేకుండా చేసి
కోరిన ఫలితం దొంగాటలాడుతూ
దోబూచులాడుతున్నట్టు
కనపడని విచ్ఛేదమొకటి
కడుపులో దేవుతున్నట్టుంటుంది

కర్తవ్యమనుకున్న దాన్ని
కాలితో తన్ని పారెయ్యలేము
అందుకోలేకపోతున్న అమోఘత్వం
అందుబాటు లోకి వచ్చే దాకా
వెలితి నిండిన బాటల మీదైనా
వెళ్తూనే వుండాలి నిరంతరంగా
రహస్య రంపపు కోతల నిప్పు కుంపట్ల
సాంగత్యాన్నే సాహసంగా మార్చుకుంటూ