కలలు కోతకొచ్చాయి

ఉచ్చస్థితికి తీసుకు వెళతారని ఊహించుకుంటే
ఉచ్ఛిష్టమే ఉపశమనమయ్యింది

కుక్కతోకతో గోదారి ఈదాలని
నడుము లోతుకు వెళ్ళి, కోరలు చూసాక తెలిసింది
అది గుంటనక్కకు గురువని,

వశీకరణ విద్యలు వట్టివనే
అమాయకులు కూడా,
వ్యాఘ్రం మనిషిలోకి
పరకాయప్రవేశం చేసాక తెలుసుకున్నారు పాపం
మహిమలు ఎప్పుడూ జరుగుతాయని,

అడవిమృగాలు వూళ్ళో కొచ్చాయి,
వలలూ, బోనులూ, కాగడాలూ, డప్పులూ
ఏమీ చెయ్యలేవని,
వాటి పైకి చెయ్యి లేవదని, చేవ చచ్చిందనీ,

నల్లమందు గింజలు
నలుదిక్కులా నాటారు, నెర్రెలు విచ్చుకున్న నేల,
నమ్మలేనంత కాపు కాసింది

గాలి కూడా గబ్బు కొడుతోంది
గంధాన్నేమో దొంగలించారు
నీకు ఇల్లు కడతానన్నారు
స్థలం చదును చేసారు
ఇనుము, ఇటుక తెచ్చారు,
పనంటూ మొదలు పెట్టారు
పాతనంతా పైకి తవ్వారు

నువ్వేమో,
వారసత్వంగా వచ్చిన
అమాయకత్వంతో
నీ ఇంటికి పునాదులేమో అనుకున్నావ్

వర్ఝం దాటాక గ్రహించావ్
నీ పక్కవాళ్ళకు సమాధులని

మందుల్లేకపొతే
మాయరోగాలతో
అర్ధాయుష్కులమవుదాం గానీ
నల్లమందు మాత్రం నీకూ, నాకూ వద్దు

తాటిచెట్టు నీడా, తాళిబొట్టు తాకట్టూ,
తాగుబోతు వాగుడూ, తప్పొప్పుల పట్టీ,
మనకేమీ కొత్త కాదు, మంచినీళ్ళ ప్రాయం

అందరూ అన్నదమ్ములు, అమ్మ కన్న బిడ్డలే
అన్నీ మంచి రోజులే అనే కమ్మని కలలు కోత కొచ్చాయి
కోసి అవతల పారెయ్యండి,
కొట్టుకు పోతాయి కొండగాలికి.