Inse yaari 2014 mein hui jab hum saawan ke mahine mein ganga mata ke pavitra jal leke Mahadev ke mandir ja rahe the. 40 kilometer ki yatra thi. Unki umar 45 aur main 28.
Uss din se aisa mann se mann ka milan hua ki aaj tak, bhagwan ki kripa se, waisi hi dor majboot hai.
Humari yeh yaari ki jankari kisiko nahi. Sab bas itna jaante hain ki Hum ek dusre se parichit hai.
Hum kab ek dusre se milte hai aur kab baatein karte hain kisiko gyaat nahi.
100 logon ki bhid mein bhi hum aankhon ke ishaaron se baatein kiya karte hain.
Ek duje ki aawaz se hi, ek dusre ki manodasha samajh lete hain.
Baarish ki cham cham mein, hum aksar bike pe sawaar hokar nikal padte hain - wo tapri pe chai pina, wo madhur geet gungunana.
Unki zindagi ke tajurbe se meri jawaani sahi marg par chal rahi hai.
Apne sukh-dukh ek duje se sabse pehle vyakt karte hain.
Aisa lagta hai, ki Hum ek dusre ko sampurna karte hain, aur humara jivan ek dusre ke liye samarpit hain.
Bhagwan se prathna karta hu, ki aisa dost sabko mile aur mera yeh dost humesha salamat rahe !