(तरही गझल)
एकदा तरी...
पडेल का हवे तसेच दान एकदा तरी ?
बनेल का गरीब हा प्रधान एकदा तरी ?
रुसू नकोस पावसा ! असा यथेच्छ बरस की
फुलेल हे उजाड माळरान एकदा तरी
अता कुठे मुभा मला भिजायची, पळायची ?
बघेन होउनी पुन्हा लहान एकदा तरी
मिळेल का कधी मला, स्वतःसवे बसायला ?
जगून या युगात वेगवान एकदा तरी
मिटून जात-पात, धर्म, संप्रदाय या जगी
दिसेल का हरेक जण समान एकदा तरी ?
हवी अशी बुलंद झेप जीवनात 'विश्वजित'
तुझ्यापुढे झुकेल आसमान एकदा तरी
• विश्वजीत दीपक गुडधे,
अमरावती.
==================================
(क्रांति साडेकर यांच्या "पडेल का हवे तसेच दान एकदा तरी" या मिसऱ्यावर आधारित...)