मरुधरा मतवाळी
मोकळी मै'मा वाळी
इदक रंगवाळी
फुटरी फड़कती
धिन-धिन धोरा धरती
मरुधरा मतवाळी
सोनै जैड़ी सुरंगी
चाँदी ज्यूं चिलकै
जिगमिग चमकै वाळी
पळकै धोरा पाळी
मरुधरा मतवाळी
मीठी सौरम
मदमस्त चालती
बळखाती खिखरां करती
उड़ती रेत रुपाळी
रमक रमणिया करती
मरुधरा मतवाळी
वायरै साथै सरकती
करै हालरिया अठखैळी
चपल-चंचळ मुसकावै
शरमावै ज्यूं जीजा अर साळी
मरुधरा मतवाळी
ठाडी छींया बैकळू रेत
मिनख-मानवी रौ
मुरधर स्यूं हेत
आछी अझकाई वाळी
मरुधरा मतवाळी
✍ Sheela S