ચાહશે કોઈ એ આશાએ જીવ્યે જાઉં છું!
છે કશે કોઈ એ આશાએ જીવ્યે જાઉં છું!
લાખ યત્નો છતાં કોઠે ન પડી એકલતા,
આવશે કોઈ એ આશાએ જીવ્યે જાઉં છું!
જાઉં તો પૂછે પ્રભુ, જે હતું એ આપ્યું કદી?
માંગશે કોઈ એ આશાએ જીવ્યે જાઉં છું!
ખૂબ કરગરવા છતાં જ્યાં ન ઉદાસી પહોંચી,
ત્યાં જશે કોઈ એ આશાએ જીવ્યે જાઉં છું!
સાંભળ્યું છે કે પ્રણયમાં તો સતત મોત મળે,
મારશે કોઈ એ આશાએ જીવ્યે જાઉં છું!
જીવું છું જીવું છું એવું જ રટણ ચાલે સતત,
માનશે કોઈ એ આશાએ જીવ્યે જાઉં છું!
સંદીપ પૂજારા