कौमी तरानो
सुहिणी यादि रखनि था मन में सिन्धी
सच ऐं तहज़ीबुनि जे फ़न में सिन्धी
महिर कई आ झूलण सारे जग॒ ते
कदम वधाए थो सिंधी हर दग॒ ते
राजा डा्हिर जी कुर्बानी
त्वारीख़ बणाई लासानी
जोशु जगा्इनि हर हिक तन में सिंधी
सच ऐं तहज़ीबुनि जे फ़न में सिंधी
मारुईअ ज्यां सेजनि खे ठुकराईंदा
पंहिंजे वतन जी लोई किअं लाहींदा
मिठिड़े मुल्क जी सोनु मिट्टी
चिलक चमक आ चित में चिट्टी
बु्ड॒ल रहनि था सिक जे धन में सिन्धी
सच ऐं तहज़ीबुनि जे फ़न में सिन्धी
यादि अचनि थियूं भग॒तियूं संत कंवर जूं
झोलियूं लोलियूं निरमल नींहं महिर जूं
अहिड़ो पुख्तो जतनु कंदा
हिन्दु में पंहिंजो वतनु कंदा
कोहिनूर फ़िको आ, आहि रतन में सिन्धी
सच ऐं तहज़ीबुनि जे फ़न में सिन्धी
अथनि कुल्हे ते नींहं जी का ग॒ठिड़ी
महिर कई आ मालिक भी का मिठिड़ी
जग॒ लाइ रेशम हंधु कंदा
कुर्बानु हेमूंअ ज्यां कंधु कंदा
अमन प्रेम लाइ जुड़ियल जतन में सिन्धी
सच ऐं तहज़ीबुनि जे फ़न में सिन्धी
सिन्धू सभ्यता कीन भुलाए सघंदा
जागीर पुराणी तोड़ु निभाए रहंदा
शानु मानु मूअनि जो दड़ो
भल आहे दबि्यलु, दुनिया में खड़ो
राम जिआं भी रहंदा बन में सिन्धी
सच ऐं तहज़ीबुनि जे फ़न में सिन्धी
शाहु सचलु सामी ऐं श्यामु वफ़ा
जिनजी रचनाउनि में आहि शफ़ा
मोहनु लालु हरीशु गुनो
सोनो साहित जो आहि कुनो
दाख़िल अख़रु थियो आ हर कन में सिन्धी
सच ऐं तहज़ीबुनि जे फ़न में सिन्धी
पोपटी सुंदरी पारू रानी कर्णा
अजर अमर रहंदी जिनजी हर रचना
कार्ज कयनि बसि लाहूती
जीवन जी डि्नाऊं आहूती
रहंदा साहित जे पन पन में सिन्धी
सच ऐं तहज़ीबुनि जे फ़न में सिन्धी
केटी दादलाणी़
भोपाल