पुरुबवा से अइलें बलम
बेशरम होके,
मुंहवा में धइलें रहें उ चिलम
बेशरम होके |
नाइ देखेलें उ
ना निरखेलें उ
नाइ बुझेलें उ
ना बुझावेलें उ
धोई अइलें उ सगरी शरम ...बेशरम होके...
कपसल रहेलें हदसल रहेलें,
खाना दाना पानी से बिछड़ल रहेलें,
जरत जवानी हमार देखे न रजऊ,
बाती बे बाती में बिगड़ल रहेलें |
उहवाँ करी अइलें कवन करम
बेशरम होके,
पुरुबवा से अइलें....
सूतला में कवन कवन नाव बड़बड़ालें,
खोदी के जगा दी त बहुते घबड़ालें,
मरतानी मुँह नाही फेरे लें रजऊ,
राती बेराती उठी उठी चली जालें |
सूखवा के कई दिहलें उ भरम बेशरम होके,
पुरुबवा से अइलें....
सुने राजदार के न सुनेला सुजीत के ,
छाती पीटत रहे बंगलिनिया के प्रीत के,
सजल धजल सब बेकार कइलें रजऊ,
तनिको बुझेला नाही प्यार वाला गीत के |
सुगवा तूरी अइलें सगरी धरम
बेशरम होके,
पुरुबवा से अइलें....
- रविन्द्र राजदार