बिन कुछ कहे ते सबला सिखाथस

नानकुन तील ले ताड़ बन जाथस।
दे के हरियाली ते जग ल सजाथस।
एकम के चंदा कस बढ़ के जम्मों
जन जीवन म खूशियां बगराथस।
सिरतोन कहत हौ मे बिन कुछ कहे ते सबला सिखाथस।

नदिया नरवा कंचन कानन
पशु-पक्षी के जीवन दाता
धरती धरोवर नीला अंबर
सबके तैह आश्रय दाता
चिर के छाती अन्न उगाथस
सिरतोन कहत हौ मे बिन कुछ कहे ते सबला सिखाथस।

आमा अमरैया अउ तोर शीतल छईया
तोर ले सिंगारय ये धरती मैया
पुन्नी के चंदा कस मया बगराथस
सिरतोन ककरो म तै भेद नई मानस
सिरतोन कहत हौ मे बिन कुछ कहे तै सब ला सिखाथस।

✍️ प्रदीप कुमार