જોઈ તમને
હસતા આ મુખમાં એ મલકાઈ હશે,
જોઈ તમને કોઈ ગઝલ લખાઈ હશે.
આવીને વસી ગઈ છે લાલિમા હોઠે,
સુંદરતા ફૂલોની ક્યાંક છલકાઈ હશે.
કેદ છે કાજળ કેરા કામણના કેફમાં,
નજરો જે અજાણતાં અથડાઈ હશે.
નાજુક આ કાયા કેરી મદમસ્ત ચાલમાં,
મોહકતા ડગલે ને પગલે અટવાઈ હશે.
છે લય કંઈ લમણે લટકતી આ લટમાં,
ગૂંથાવા એમાં વેણી પણ લલચાઈ હશે.
વસંતના આંગણે હતી રૂપની મહેફિલ,
કદાચ સુંદરતા તમારી જ ચર્ચાઈ હશે.
સુંદર સવારે તમે સામે મળ્યાના શુકને,
તકદીરો કંઈ કેટલી અહીં પલટાઈ હશે.
- નરેશ કુશવાહા