Bik gaye makaaN puraney wo, yadein dhundhli hui jaati haiN
Ped naye, pidhi nayee, pattiyaN hameiN samjhati haiN
Khil chuke phool purane ab nayi umang ki baari hai
Kat gayee fasal kal ki ab agli fasal ki taiyyari hai
Agle din aise hi hoN, ye tumhare sapne hi haiN
Acche bure jaise bhi hoN, beej tumhare apne hi haiN
Ra-e do apni, man ho to, par ho ga wo jo ye chahenge
Beej tumne jaise boye, waise hi wo ug payenge
Ab dhyan karo apne jivan par, kya bhala kiya, kya nahiN kiya
Dev ki suni ya danav ki, galat kiya ya sahi kiya
Aur apne jivan meiN baaki jo bhi karo sahi karo
Sahi agar kuch na soojhe, chup chaap kucch bhi nahiN karo
Bik gaye makaan puraney wo, yadein dhundhli hui jaati haiN
Ped naye, pidhi nayee, pattiyaN hameiN samjhati haiN
Kishore Asthana
kishore.asthana@gmail.com