बात जुलाई- अगस्त 1995 की छै। म्हारी एक छोटी सी कविता राजस्थानी भासा की लघु पत्रिका ‘ओळी- ओळी’ में छपी छी। पत्रिकान् में रचना छपबा को आपणों अपनो सुख होवै छै। पॅण ईं सूँ भी बत्तो सुख मिलै छै जद कोय मोजीज रचनाकार ऊँ रचना पे आपकी पूँठ थपथपा द्ये छै। ओळी- ओळी में कविता छप्याँ थोड़ा ही दिन बीत्या छा के एक दन डाक सूँ एक पोस्टकॉर्ड मिल्या। ऊँ दौर में पोस्टकॉर्ड चलन सूँ अतना बाह्रै न्हँ होया छा। म्हारे गौड़े तो आज भी आदरजोग हरिवंश राय बच्चन, बालकवि बैरागी, डॉ. उर्मिलेश, क्षेमचंद्र सुमन, के.पी.सक्सैना, मन्नूलाल शील जश्या कतना ही मौजीज रचनाकाराँ का हाथ सूँ माँड्या पोस्टकॉर्ड धर्या छै। म्हूँ आज भी पोस्टकॉर्ड माँडू छूँ, या नाळी बात छै के अब पोस्टकॉर्ड की पावती पाबा हाळो ईं ढब सूँ व्हॉट्जएप पे द्ये छै- मानो ओळमो दे र्यो होवै के म्हँने कंजूसी बरती अर पोस्टकॉर्ड माँड्योअगस्त 1995 का जीं पोस्टकॉर्ड की बात म्हँने ऊपरै करी, ऊँ पे सैं सूँ ऊपर अंग्रेजी में माँडबा हाळा को पतो मँड्यो छो अब फेर माँडबा हाळा ने राजस्थानी में माँड्यो छो -
‘चि. कनक
ओळी- ओळी में थारी कविता -‘कविता रो मोल’ बांची। मनैं चोखी लागी। सांची बात कही। पोथा छपै, कुण बांचै बां नै।
तुयां लिखता रवो।
म्हारी शुभ आशीष।
थारो
कन्हैयालाल सेठिया ।’
आप समझ सको छो के एक मोट्यार माँडबा हाळा के बेई यो कागद/ यो पोस्टकॉर्ड कतनो मोल रखाणै छो। ऊँ बगत तांई हिन्दी कविसम्मेलनां में तो म्हारी ओळखाण बणबा लागी छी, पॅण राजस्थानी में तो म्हँने नुओ नुओ माँडबो सरू कर्यो छो। ऊ भी ऊँ ओळमा के पॉण, जे देता सताँ म्हारा अंचल का ही एक नामचीन कवि ने दूजा कवि सूँ क्ही छी -‘‘हिन्दी में चार कविता माँड’र गलो फाड़ चीख ल्ये जो कोय भी अखिल भारतीय कवि हो सकै छै। बात तो जद छै जद आपणी बोली में माँड’र दिखावै।’’ म्हूँ वाँ दिनाँ कविसम्मेलनाँ में वीर रस की कवितावाँ बोलबो करै छो, अर अखिल भारतीय कविसम्मेलनां में चाव सूँ सुण्यो जावै छो।’’ ओळमो म्हारे काळज्या पे लाग्यो। बात में दम भी छो। म्हारी माँ सा आप हिन्दी अर राजस्थानी की जानी मानी कवियत्री छै। राजस्थानी का जे संस्कार रगाँ में छा, वे स्यात् मुळकबा का ओळावा की बाट न्हाळ र्या छा।
म्हँने राजस्थानी भासा में कवितावाँ माँडबो सरू कर्यो। अर वाँ सरूवाती कवितावाँ में सूँ ही एक कविता ‘कविता रो मोल’ ओळी- ओळी में छपी छी। ईं सूँ लगै-टगै आठ-दस बरस प्हैली आदरजोग सेठिया सा का दरसन करबा को सुख कोटा में मिल्यो छो। कोटा में वाँ की ब्हैन परणाई छै अर आपणीं ब्हैन अर बहनोई सा सूँ भेंटबा बेई सेठिया सा कोटा पधार्या छा। कोटा की साहित्यिक संस्था भारतेन्दु समिति में वाँ का सम्मान में एक काव्यगोष्ठी रखाणी छी। श्हैर में आबा हाळा नामचीन रचनाकारां का सम्मान में गोष्ठी रखाणबों वां दिनां भारतेन्दु समिति की रिजक छी। म्हारी ऊमर पंद्रह- सोलह बरस र्ही होवैगी। या बात तो म्हूँ बताबो ही बिसर ग्यो के तेरह-चौदह बरस की ऊमर सूँ ही म्हूँ कवि सम्मेलनां मे कवितावाँ पढ़बा लाग्यो छो। ऊँ कविगोष्ठी में कोटा का दूजा नामचीन कवि भी छा। म्हूँ न्हँ मानूँ के म्हारी हिन्दी कविता ने कोय खास असर कन्हैया लाल जी सेठिया का हिवड़ा पे ऊँ अगत छोड्यो होवैगो। ऊँ कवि गोष्ठी में वाँ ने आपणीं कवितावां भी सुणाई। -आ धरती गोरा धोरां की माँडबा हाळा जीं कवि के तांई म्हूँ आपणीं पढ़ाई की किताबाँ में बाँचबो करै छो, ऊँ के सागै एक जाजम पे बैठबो ही म्हारै मांन का मोट्यार के बेई एक लोठो सुख छो। फेर एक दन म्हूँ हाड़ौती का नामचीन कवि प्रेमजी प्रेम की लैरां आदरजोग सेठिया जी सूँ भेंटबा बेई वाँ का बहनोई सा के घरां भी ग्यो। दोन्यूँ बड़ा रचनाकार श्हैर अर राजस्थान का सिंस्करतिकरम, राजस्थानी भासा की मानता जश्या विखै पे बंतळ करता र्या। म्हूँ कांई बोलतो? छानो मूनो सुणतो र्यो। प्रेमजी प्रेम ने एक बेर फेर म्हारो परिचै देबा को जतन कर्यो तो वाँ ने क्ही -’’ऊँ कविगोष्ठी में सुण्यो छो ईं के तांई।’’ चालती बग़ताँ म्हँ ने वाँ का पग छुया तो वाँ ने लाड़ सूँ माथा पे हाथ फेर द्यो। 3 अगस्त पिच्यानवे को ऊँ पोस्टकॉर्ड में जद म्हँने पढ्यो - लिखता रवो। म्हारो शुभ आशीष’’ तो म्हँने म्हारा माथा पे ऊ ही परस सुमिर्यायो।
एक लघुपत्रिका में एक छोटी सी कविता बाँच’र आज कुण आसीस बख्सै छै? आज जद लोगाँ के तांई एक दूजा की टांग खिंचाई का पड़पंच रचतां ओळखूँ छूँ तो सोचूँ छूँ मनख अश्याँ ही बड़ो न्हँ होवै। बड़ो होबा बेई बड़ेरचारो निभाणो भी आणो चाहिजै अर बड़ेरचारो निभाबो आ जावै तो पीढ़ियाँ के बेई एक छोटो सो पोस्टकॉर्ड भी घणों महताऊ हो सकै छै!