कंकन किंकिनि नूपुर धुनि सुनि।
कहत लषन सन राम हृदय गुनि॥
मानहुँ मदन दुंदुभी दीन्ही।
मनसा बिस्ब बिजय कहँ कीन्ही॥
अस कहि फिरि चितए तेहि ओरा।
सिय मुख ससि भए नयन चकोरा॥
भए बिलोचन चारु अचंचल।
मनहुँ सकुचि निमि तजे दृगंचल॥
देखि सीय सोभा सुखु पावा।
हृदय सराहत बचनु न आवा॥
जनु बिरंचि सब निज निपुनाई।
बिरचि बिस्व कहँ प्रगटि देखाई॥
सुन्दरता कहुँ सुंदर करई।
छबि गृह दीप सिखा जनु बरई॥
सब उपमा कबि रहे जुठारी।
केहि पटतरउँ बिदेह कुमारी॥