મને મારા ઘરે થોડી સજાવટની કમી લાગી,
નજર બેઘર ઉપર પડતાં વ્યથા એ વામણી લાગી.
છે નાતો રક્તનો એનો, જનમથી મારી સાથે છે,
મને પીડા બધી દિલની સગી માની જણી લાગી .
હતો એને ય અંદેશો કે અહીં પાણી વધુ રહેશે,
ખુદાએ તેથી આંખોની ઉપર પાંપણ ચણી લાગી.
અગર છે આગ ઉલફતની ,નહીં બુઝે મુસીબતમાં ,
ભડકશે ઓર તેજીથી , હવા ગમની જરી લાગી.
હું માંગું મારા સપનામાં, તરત હાજર કરી દે છે,
મને પિતામાં ઈશ્વર ને જનેતામાં પરી લાગી.
મળે બદલો અહીંનો અહીં, ખરા ખોટા આ કર્મોનો,
ઓ ઈશ્વર,તારી હિસાબી-પ્રથા સૌ વાજબી લાગી.
~ રશ્મિ અગ્નિહોત્રી