ધ્યાનમાં છું, ને વળી બેધ્યાન છું,
હું તો મારી મોજમાં મસ્તાન છું.
કો' ફકીરે પાથર્યું કંતાન છું ,
ચેતવેલા ધૂપનું લોબાન છું.
હું સમસ્યા શબ્દથી અનજાન છું,
કાળી મહેનત જાણતો ઈન્સાન છું.
લાખો ઈચ્છાની અખોવન માત હું,
શક્યતાના ભાવિનું ઓધાન છું.
મસ્ત મૌલા માનવી છું મૂળથી ,
હું અસલમાં સ્વર્ગનો દરવાન છું.
રોદણાં રડવાની આદત ના મને ,
હું ગઝલના તાનમાં ગુલતાન છું.
દેહના દેરાંમાં બેઠો જીવ થઈ,
સૂક્ષ્મ રૂપે ,જો, સ્વયં ભગવાન છું.
~ રશ્મિ અગ્નિહોત્રી
અખોવન - જેનું એકપણ સંતાન મરી ન ગયું હોય એવી સૌભાગ્યવતી સ્ત્રી
ઓધાન- ગર્ભ રહેવો તે