કોઈ ખાખી ને હિસાબી ડાયરી ,
શરબતી છે કો' નશીલી ડાયરી.
ના કશું છૂપાવે મારી ડાયરી,
જિંદગી ખુલ્લી પડેલી ડાયરી.
ભાષા શીખી લો તમે જો પ્રેમની,
આંખમાં વંચાય આખી ડાયરી.
પાન-પાને છે ભરેલી યાદ સૌ,
સાચવે થાપણ તમારી ડાયરી.
ભાષા શીખી લો તમે જો પ્રેમની,
આંખમાં વંચાય આખી ડાયરી.
કોઈ ખુલ્લી, ને ચપોચપ કોઈ બંધ,
ફાટી-તૂટી કોઈની થઈ ડાયરી.
કાળો ધોળો ભેદ એમાં સાચવી ,
ફરતાં સૌ બગલોમાં દાબી ડાયરી.
કેવી રીતે આપશો એ ઉત્તરો,
પૂછશે પ્રશ્નો જો મારી ડાયરી.
એકસરખી બાંધણી એણે કરી,
તોય નોખી ભાત સૌની ડાયરી .
જઈને સોંપી દેજો ઈશના હાથમાં,
મન-વચન-કર્મે લખાતી ડાયરી.
જે ગણો તે મારી મૂડી આટલી,
વારસામાં લો ગુલાબી ડાયરી.
~ રશ્મિ અગ્નિહોત્રી