મને એવી ખબર નહોતી ભરમ ચાહત બની જાશે,
નહીં બુઝે કદી એવી અમર આરત બની જાશે.
જો સપનામાં તું મળવાને બનાવે રોજની ઘટના,
હકીકતમાં એ ઘટનાઓ પછી આદત બની જાશે.
કહું જો હું કે આ હાલત અમારી થઈ છે કોનાથી,
નગર આખામાં ચર્ચાની કોઈ બાબત બની જાશે.
મળે તું સ્મિત કરી ,આંખો પરોવે મારી આંખોમાં,
કસમથી દુખતા દિલની એ ઘણી રાહત બની જાશે.
ન જોઈતાં કો' તાવીજો, ન ધનદોલતના ઢગલાઓ,
દુઆઓ જો હશે સાથે, એ હિફાજત બની જાશે.
સદીઓથી ને યુગોથી જીવો છો આ જ પૃથ્વી પર,
ધરાને લાગણી આપો ,જરા લાગત બની જાશે .
મને ઈશની ખબર ક્યાં છે , પરંતુ ચાહું સૃષ્ટિને,
વધી જાશે અગર ચાહત તો ઈબાદત બની જાશે.
-રશ્મિ અગ્નિહોત્રી